ᓄᓇᕗᒻᒥ ᐃᓄᐃᑦ ᓂᕐᔪᑎᖏᓐᓂᒃ ᐆᒪᔪᓕᕆᔨᒃᑯᑦ
ᓄᓇᕗᒻᒥ ᐃᓄᐃᑦ ᓂᕐᔪᑎᖏᓐᓂᒃ ᐆᒪᔪᓕᕆᔨᒃᑯᑦ ᑲᑎᓚᐅᖅᑐᑦ ᔭᓄᐊᕆ ᓄᖑᑉᐸᓪᓕᐊᓂᖓᓂᑦ 2006-ᒥᑦ ᖃᐅᔨᔪᒪᑉᓗᑎᒃ ᓯᕗᓪᓕᖅᐸᐅᑎᔭᕆᐊᖃᖅᑕᖏᓐᓂᑦ ᐅᖃᐅᓯᖃᕐᓗᑎᒡᓗ ᐊᕕᒃᑐᖅᓯᒪᔪᓂᑦ ᐊᒻᒪᓗ ᓄᓇᕗᒻᒥ ᐱᔾᔪᑕᐅᔪᓂᒃ. ᐱᓕᕆᐊᓗᐊᕆᔪᒪᔭᖓᑦ ᐃᒪᓐᓇᐃᑦᑐᑦ:
- ᑐᑭᓯᓐᓇᖅᑐᓂᒃ, ᑕᑯᒃᓴᐅᔪᒃᑯᑦ ᐊᒻᒪᓗ ᓇᓚᐅᑦᑎᔪᓂᒃ ᑮᓇᐅᔭᐃᑦ ᒥᒃᓵᓄᑦ ᐅᓂᑉᑳᓕᐅᕆᖃᑦᑕᕐᓗᑎᒃ ᑲᑎᒪᔨᓄᑦ ᐊᒻᒪᓗ ᐆᒪᔪᓕᕆᔨᐊᓛᒃᑯᓐᓄᑦ.
- ᐊᕐᕌᒍᑕᒫᖅᓯᐅᑎᒥᒃ ᐅᓂᑉᑳᓕᐅᖃᑦᑕᕐᓗᑎᒃ ᐆᒪᔪᓕᕆᔨᐊᓛᒃᑯᑦ ᐊᒻᒪᓗ ᐊᕕᒃᑐᖅᓯᒪᔪᓂᑦ ᐊᑐᕈᖕᓇᕐᓂᐊᖅᑕᖏᓐᓂᒃ ᐊᕌᒍᑕᒫᖅ ᑲᑎᒪᓂᖓᓐᓂᑦ.
- ᑐᑭᒧᐊᒃᑎᕐᓗᒋᑦ ᐊᕕᒃᑐᖅᓯᒪᔪᓂᑦ ᑲᑎᒪᓃᑦ ᐊᒻᒪᓗ ᐅᖃᖃᑎᖃᕐᓃᑦ.
- ᐊᑐᐊᒐᓕᐅᕐᓗᑎᒃ ᐊᒻᒪᓗ ᐊᑐᖅᑕᐅᔪᒃᓴᓂᒃ ᓄᓇᕗᒻᒥ ᐃᓄᐃᑦ ᓂᕐᔪᑎᖏᓐᓂᒃ ᐆᒪᔪᓕᕆᔨᒃᑯᓐᓄᑦ.
ᓄᓇᕗᒻᒥ ᐃᓄᐃᑦ ᓂᕐᔪᑎᖏᓐᓂᒃ ᐆᒪᔪᓕᕆᔨᒃᑯᑦ ᐱᒋᐊᖅᐸᓪᓕᐊᓂᖃᓚᐅᖅᑐᑦ ᐊᒻᒪᓗ ᐅᒃᐱᕆᔭᐅᓗᑎᒃ ᐱᔪᖕᓇᕐᒪᑕ ᑕᐃᒪᙵᓂᑦ ᐱᒋᐊᕐᒪᑦ ᖃᑉᓯᐊᕐᔪᓂᒃ ᑲᑐᔾᔨᖃᑎᒌᒃᑯᓐᓂᑦ ᐅᕐᓂᒃᑕᐅᑉᓗᑎᒃ ᐱᓕᕆᖃᑎᖃᕈᒪᔪᓂᒃ ᐊᔪᕈᖕᓃᖅᓴᐃᓂᕐᒧᑦ, ᑐᕌᖓᔪᓕᕆᓂᕐᒧᑦ ᐊᒻᒪᓗ ᓄᓇᓕᖕᒥᐅᓂᒃ ᐅᖃᖃᑎᖃᕐᓂᕐᒧᑦ ᐊᓯᖏᓪᓗ. ᐱᓕᕆᐊᒃᓴᓗᐊᕆᒐᓗᐊᖅᖢᒍ ᐆᒪᔪᓕᕆᔨᐊᓛᒃᑯᓐᓂᑦ ᐊᒻᒪᓗ ᐊᕕᒃᑐᖅᓯᒪᔪᓂᒃ ᐃᑲᔪᐃᓂᕐᒥᒃ, ᓄᓇᕗᒻᒥᑦ ᐃᓄᐃᑦ ᓂᕐᔪᑎᖏᓐᓂᒃ ᐆᒪᔪᓕᕆᔨᒃᑯᑦ ᐃᑲᔪᖃᑦᑕᓕᕐᓂᐊᖅᑐᑦ ᓲᕐᓗ ᕿᒥᕐᕈᓗᒋᑦ ᖃᐅᔨᓴᐃᓂᕐᒧᑦ ᐊᑐᖅᑕᐅᖃᑦᑕᖅᑐᑦ, ᓂᕐᔪᑎᓂᒃ ᐊᐅᓚᑦᑎᓂᕐᒥᒃ ᐊᒻᒪᓗ ᒥᐊᓂᖅᓯᓂᕐᒥᑦ ᐊᒻᒪᓗ ᐊᑐᐊᒐᓕᐅᕆᓂᕐᒥᑦ.
ᐃᓚᖏᑦ ᐱᐊᓂᒃᑕᐅᓯᒪᔪᑦ ᐅᑉᓗᒥᒧᑦ ᑎᑭᖦᖢᒍ
- ᐅᑉᓗᒥᒨᓕᖅᑐᕐᓗᒋᑦ ᐊᒻᒪᓗ ᐋᖅᑭᒃᓱᕐᓗᒋᑦ ᐊᕕᒃᑐᖅᓯᒪᔪᓂᑦ ᑮᓇᐅᔭᓕᕆᓂᕐᒧᑦ ᑎᑎᖅᑲᐅᑎᖏᑦ;
- ᐱᓕᕆᐊᕆᓗᒋᑦ ᑮᓇᐅᔭᐃᑦ ᒥᒃᓵᓄᑦ ᑎᑎᖅᑲᐃᑦ ᐆᒪᔪᓕᕆᔨᐊᓛᒃᑯᑦ ᐊᙳᑎᑎᓪᓗᒋᑦ ᒪᓕᒐᓕᕆᓂᕐᒧᑦ ᑎᑎᕋᖅᑕᐅᓯᒪᕝᕕᖏᓐᓄᑦ;
- ᑎᑎᕋᕐᕕᒃᑖᕐᓗᒋᑦ ᑰᒑᕐᔪᒃ, ᑲᖏᖅᖠᓂᖅ, ᑭᒻᒥᕈᑦ, ᐃᖃᓗᐃᑦ ᐊᒻᒪᓗ ᓴᓂᕋᔭᒃ ᐊᒻᒪᓗ ᐱᓕᕆᔨᓂᒃ ᐃᓐᓄᒃᑕᐅᑎᓪᓗᒋᑦ ᑖᑉᑯᓇᓂ ᓄᓇᓕᖕᓂᑦ;
- ᐅᑉᓗᒥᒨᓕᖅᑐᕐᓗᒋᑦ ᐸᐃᓛᖑᔪᑦ ᓈᒻᒪᒋᔭᐅᓚᐅᖅᑐᑦ ᐱᖓᓱᓄᑦ ᐊᕕᒃᑐᖅᓯᒪᔪᕐᓄᑦ;
- ᐃᑲᔪᕐᓗᒋᑦ ᐅᑉᓗᒥᒨᓕᖅᑐᕐᓗᒋᑦ ᐱᓕᕆᐊᕆᓗᒋᓪᓗ ᐆᒪᔪᓕᕆᔨᐊᓛᒃᑯᑦ ᑎᑎᖅᑲᐅᑎᖏᑦ ᓈᓴᐃᔨᓄᑦ ᐊᑐᖅᑕᐅᓂᐊᖅᑐᑦ;
- ᐱᓕᕆᖃᑎᒋᑦᑎᐊᕐᓗᒋᑦ ᑲᓇᑕᒥᑦ ᑖᒃᓰᔭᐃᔭᖅᑐᓕᕆᔨᒃᑯᑦ ᐱᓕᕆᔨᖏᑦ ᐆᒪᔪᓕᕆᔨᐊᓛᒃᑯᑦ ᐊᒻᒪᓗ ᐊᕕᒃᑐᖅᓯᒪᔪᑦ ᑐᖅᑯᖅᓯᓯᒪᕝᕕᖏᑦ ᐅᑉᓗᒥᒨᓕᖅᑐᕐᓗᒋᑦ ᐊᒻᒪᓗ ᒫᓐᓇᐅᔪᒧᑦ;
- ᐋᖅᑭᒃᓯᓗᓂ ᐊᑕᐅᓯᕐᒦᓕᖓᔪᒥᒃ ᐱᓕᕆᔨᓄᑦ ᐊᑭᓕᖅᑐᐃᓂᕐᒥᒃ ᐃᓚᐅᓗᑎᒃ ᐆᒪᔪᓕᕆᔨᐊᓛᒃᑯᓐᓄᑦ ᐊᐅᓚᑦᑎᔩᑦ 24-ᓂᑦ 25-ᖑᔪᓂᑦ ᓄᓇᓕᖕᓂᑦ ᐊᒻᒪᓗ 100 ᐅᖓᑖᓅᖅᑐᓂᒃ ᐆᒪᔪᓕᕆᔨᐊᓛᒃᑯᓐᓄᑦ ᑲᑎᒪᔨᓄᑦ;
- ᐊᕕᒃᑐᖅᓯᒪᔪᑦ ᐊᕐᕌᒍᑕᒫᖅ ᑲᑎᒪᑎᓂᖏᑦ, ᑲᑎᒪᔩᑦ ᑲᑎᒪᓂᖏᑦ ᐊᒻᒪᓗ ᐅᖃᓘᑎᒃᑯᑦ ᑲᑎᒪᓃᑦ ᐱᐊᓂᒃᑕᐅᖃᑦᑕᕐᓗᑎᒃ ᐊᔾᔨᒌᒃᑐᒃᑯᑦ, ᑲᑎᒪᔾᔪᑏᑦ ᐱᓕᕆᐊᖑᖃᑦᑕᕐᓗᑎᒃ ᐊᒻᒪᓗ ᐱᖁᔨᕗᖔᓕᐅᕈᑏᑦ ᖃᐅᔨᒋᐊᖅᑕᐅᖃᑦᑕᕐᓗᑎᒃ;
- ᐃᑲᔪᕐᓗᒋᑦ ᐊᕕᒃᑐᖅᓯᒪᔪᓂᑦ ᐊᒻᒪᓗ ᐆᒪᔪᓕᕆᔨᐊᓛᒃᑯᑦ ᕿᒥᕐᕈᓗᒋᑦ ᐊᒻᒪᓗ ᑭᐅᔾᔪᑎᒋᓗᒋᑦ ᖃᐃᔨᓴᐃᓂᕐᒧᑦ ᐊᑐᖅᑕᐅᖃᑦᑕᖅᑐᑦ ᑐᒃᓯᕋᐅᑎᓂᒃ;
- ᐃᑲᔪᕐᓗᒋᑦ ᓄᓇᕗᒻᒥᑦ ᒪᖃᐃᑎᓄᑦ ᐃᑲᔪᐃᓂᕐᒧᑦ ᑐᕌᖓᔪᖅ-ᒥᑦ ᐱᓕᕆᔩᑦ ᐱᓕᕆᐊᖏᓐᓄᑦ, ᖃᐅᔨᒋᐊᖃᑦᑕᕐᓂᕐᒧᑦ ᐊᒻᒪᓗ ᑭᖑᓂᐊᒍᑦ ᑲᒪᒋᔭᖃᕐᓂᕐᒧᑦ ᑕᒪᓐᓇ;
- ᐱᐊᓂᓚᐅᖅᑐᑦ ᐊᒥᓱᑦ ᐱᐊᓂᑦᑎᐊᖅᓯᒪᔪᑦ ᐊᐅᓚᑦᑎᔩᑦ ᐊᔪᕈᖕᓃᖅᓴᖅᑕᐅᓂᖏᑦ ᑲᖏᖅᖠᓂᕐᒥᑦ ᐊᒻᒪᓗ ᐃᖃᓗᖕᓂᑦ;
- ᐱᐊᓂᒃᓯᒪᔪᑦ ᐊᒥᓱᑦ ᑲᑎᒪᔩᑦ ᐊᔪᕈᖕᓃᖅᓴᖅᑕᐅᓂᖏᑦ ᓄᓇᓕᖕᓂᑦ;
- ᐱᐊᓂᒃᓯᒪᔪᑦ ᑮᓇᐅᔭᓄᑦ ᐊᒻᒪᓗ ᐃᓄᓕᕆᓂᕐᒧᑦ ᐊᑐᐊᒐᐃᑦ ᐆᒪᔪᓕᕆᔨᐊᓛᒃᑯᓐᓄᑦ;
- ᐆᒪᔪᓕᕆᔨᐊᓛᒃᑯᑦ ᐊᐅᓚᑦᑎᔨᖏᓐᓄᑦ ᑮᓇᐅᔭᓕᐊᑦ ᐊᒻᒪᓗ ᐃᑲᔫᑏᑦ ᐊᒻᒪᓗ ᐱᓕᐊᖅ ᖃᓄᐃᑦᑑᓂᖏᑦ ᐱᓕᕆᐊᖑᓗᑎᒃ;
- ᐱᐊᓂᒃᓯᒪᔪᖅ ᑕᖅᑭᑕᒫᑦ ᑮᓇᐅᔭᓕᐊᓄᑦ ᐊᑐᐊᒐᖅ.